humne kuchh yun bhi alag chun liya jada apna

ham ne kuchh yuuñ bhī alag chun liyā jaada apnā

ab ke hai aur hī manzil kā irāda apnā

sab ke letā hai qadam ye dil-e-sāda apnā

ham ne rakkhā nahīñ dar yūñhī kushāda apnā

hijr jab jaan kā āzār ho paimāne meñ

terā ġham ghol ke pī lete haiñ baada apnā

mausam-e-gul meñ tumheñ lauT ke aanā thā kaho

yaad aatā nahīñ bhūlā huā vā'da apnā

sūkhī lakḌī pe chalā ho koī aarā jaise

kar liyā hijr meñ tan aise burāda apnā

hai milā aisā sukūñ oḌh pahan kar is ko

dā.imī ranj tirā ab hai labāda apnā

aisā lagtā hai zamāne kī havā un ko lagī

hai mirā dhyān unheñ par hai ziyāda apnā

jām-e-labrez ko mere haiñ vo aadhā kahte

aur bharā jaam dikhe hai unheñ aadhā apnā

degā shah-māt ye ik din ise 'nasrīñ' ham ne

saiñt rakkhā hai jo kuchh soch ke pyāda apnā

hum ne kuchh yun bhi alag chun liya jada apna

ab ke hai aur hi manzil ka irada apna

sab ke leta hai qadam ye dil-e-sada apna

hum ne rakkha nahin dar yunhi kushada apna

hijr jab jaan ka aazar ho paimane mein

tera gham ghol ke pi lete hain baada apna

mausam-e-gul mein tumhein lauT ke aana tha kaho

yaad aata nahin bhula hua wa'da apna

sukhi lakDi pe chala ho koi aara jaise

kar liya hijr mein tan aise burada apna

hai mila aisa sukun oDh pahan kar is ko

daimi ranj tera ab hai labaada apna

aisa lagta hai zamane ki hawa un ko lagi

hai mera dhyan unhen par hai ziyaada apna

jam-e-labrez ko mere hain wo aadha kahte

aur bhara jam dikhe hai unhen aadha apna

dega shah-mat ye ek din ise 'nasrin' hum ne

saint rakkha hai jo kuchh soch ke pyaada apna