humne nazdik bhulane ka bhi fan rakkha tha

ham ne nazdīk bhulāne kā bhī fan rakkhā thā

hijr meñ dil ko bhī kuchh mast-magan rakkhā thā

ye bhī sach hai ki tujhe dil se ġharaz thī hī nahīñ

varna to jism meñ paivast hī man rakkhā thā

kab baġhāvat pe utar aa.e yahāñ kaun sā phuul

bas yahī soch ke qaabū meñ chaman rakkhā thā

jāntā kaise tujhe jhāñktā andar kaise

tujh ko ta.avīz ke jaise to pahan rakkhā thā

jab nakīrain ne chāhā ki mujhe le jaa.eñ

ruuh ġhā.eb thī kahīñ aur badan rakkhā thā

jis ko ab pyaar se jiine kā sabab kahte haiñ

ham ne us yaad kā ik naam ghuTan rakkhā thā

ham ka.ī qism ke lahjoñ ke bahut qaa.il haiñ

haañ magar apnā jo andāz-e-suḳhan rakkhā hai

hum ne nazdik bhulane ka bhi fan rakkha tha

hijr mein dil ko bhi kuchh mast-magan rakkha tha

ye bhi sach hai ki tujhe dil se gharaz thi hi nahin

warna to jism mein paiwast hi man rakkha tha

kab baghawat pe utar aae yahan kaun sa phul

bas yahi soch ke qabu mein chaman rakkha tha

jaanta kaise tujhe jhankta andar kaise

tujh ko tawiz ke jaise to pahan rakkha tha

jab nakirain ne chaha ki mujhe le jaen

ruh ghaeb thi kahin aur badan rakkha tha

jis ko ab pyar se jine ka sabab kahte hain

hum ne us yaad ka ek nam ghuTan rakkha tha

hum kai qism ke lahjon ke bahut qail hain

han magar apna jo andaz-e-suKHan rakkha hai