humne tinke se to sahil pe utar jaana hai

ham ne tinke se to sāhil pe utar jaanā hai

is se aage nahīñ mā'lūm kidhar jaanā hai

jo gayā mahfil-e-yārāñ se gayā ye kah kar

dil to kartā nahīñ jaane ko magar jaanā hai

ham ne us kā hī kahā yaad dilānā hai use

us ne kuchh baat banānī hai mukar jaanā hai

kyā batā.ūñ ki masāfat hai kahāñ kī merī

jis taraf samt nahīñ koī udhar jaanā hai

aañkh ne pheñkne rahte haiñ nazar ke kankar

aa.ina TūTnā hai 'aks bikhar jaanā hai

vaqt Thahrā huā mahsūs huā tere saath

aur ye Thahrā huā vaqt guzar jaanā hai

ye ki lagtā hī gayā bazm kī rā'nā.ī meñ

aur maiñ dil se ye kahtā rahā ghar jaanā hai

saañs ek aur kisī dam ke liye aur ik saañs

is tag-o-dau meñ sabhī ne kabhī mar jaanā hai

uTh ke baiThak se khaḌe ho ga.e darvāze par

tum ne jaanā hai chale jaao agar jaanā hai

ye nayā husn purāne se ziyāda hai magar

is na.e husn se bhī dil mirā bhar jaanā hai

ham to ġhāfil haiñ sarāsar hameñ mā'lūm nahīñ

kis taraf tum ko kaho ahl-e-ḳhabar jaanā hai

'ishq thak kar nahīñ ruktā kabhī 'āsim' is ne

vus'at-e-dasht meñ tā-hadd-e-nazar jaanā hai

hum ne tinke se to sahil pe utar jaana hai

is se aage nahin ma'lum kidhar jaana hai

jo gaya mahfil-e-yaran se gaya ye kah kar

dil to karta nahin jaane ko magar jaana hai

hum ne us ka hi kaha yaad dilana hai use

us ne kuchh baat banani hai mukar jaana hai

kya bataun ki masafat hai kahan ki meri

jis taraf samt nahin koi udhar jaana hai

aankh ne phenkne rahte hain nazar ke kankar

aaina TuTna hai 'aks bikhar jaana hai

waqt Thahra hua mahsus hua tere sath

aur ye Thahra hua waqt guzar jaana hai

ye ki lagta hi gaya bazm ki ra'nai mein

aur main dil se ye kahta raha ghar jaana hai

sans ek aur kisi dam ke liye aur ek sans

is tag-o-dau mein sabhi ne kabhi mar jaana hai

uTh ke baiThak se khaDe ho gae darwaze par

tum ne jaana hai chale jao agar jaana hai

ye naya husn purane se ziyaada hai magar

is nae husn se bhi dil mera bhar jaana hai

hum to ghafil hain sarasar hamein ma'lum nahin

kis taraf tum ko kaho ahl-e-KHabar jaana hai

'ishq thak kar nahin rukta kabhi 'asim' is ne

wus'at-e-dasht mein ta-hadd-e-nazar jaana hai