hum pe agarche bhaari guzri phir bhi thi kya pyari raat

ham pe agarche bhārī guzrī phir bhī thī kyā pyārī raat

aap bhī taḌpī saath hamāre aap bhī jaagī saarī raat

jaise jaise raat Dhalī hai dard kī lazzat aur baḌhī

yādoñ kī ḳhushbū meñ basā kar ham ne ḳhuub sañvārī raat

tere ḳhayāloñ ke parde se jab ġham-e-duniyā jhāñk uThā

ruk ga.ī jaise vaqt kī gardish ho ga.ī dil par bhārī raat

aap na māneñ aap na samjheñ aap pe dil kā zor nahīñ

ham ne apnā dard kahā hai aap se saarī saarī raat

shaam se kaliyāñ dard kī mahkīñ jalte rahe ashkoñ ke charāġh

jaise sabā gulzār se guzre ham ne aise guzārī raat

hum pe agarche bhaari guzri phir bhi thi kya pyari raat

aap bhi taDpi sath hamare aap bhi jagi sari raat

jaise jaise raat Dhali hai dard ki lazzat aur baDhi

yaadon ki KHushbu mein basa kar hum ne KHub sanwari raat

tere KHayalon ke parde se jab gham-e-duniya jhank uTha

ruk gai jaise waqt ki gardish ho gai dil par bhaari raat

aap na manen aap na samjhen aap pe dil ka zor nahin

hum ne apna dard kaha hai aap se sari sari raat

sham se kaliyan dard ki mahkin jalte rahe ashkon ke charagh

jaise saba gulzar se guzre hum ne aise guzari raat