ہم سانس بھی لینے کے سزاوار نہ ٹھہرے

ہم سانس بھی لینے کے سزاوار نہ ٹھہرے

ماضی کے خرابے کی بھی دیوار نہ ٹھہرے

سو بار دھواں پھول کے سینے سے اٹھا ہے

بادل کے قدم باغ میں اک بار نہ ٹھہرے

یوں میری امیدوں کے محل ہو گئے مسمار

جس طرح کوئی ریت کی دیوار نہ ٹھہرے

پہنچا نئے حالات کے دھارے پہ سفینہ

ممکن ہے مرے ہاتھ میں پتوار نہ ٹھہرے

چھینے لیے جاتی ہیں گلستاں کی ہوائیں

ہم برگ فسردہ کے بھی حق دار نہ ٹھہرے

اے وقت رواں ہم ہیں تیرے ساتھ ابھی تک

ٹھہریں جو کہیں ہم ترا معیار نہ ٹھہرے

حالات کے چہرے پہ دمکتی رہے سرخی

رستا ہوا خون دل فن کار نہ ٹھہرے

اے جلوۂ خاموش ترے شیش محل پر

اک سانس کی دستک بھی کہیں بار نہ ٹھہرے

مسکن مرا اس راہ حوادث میں ہے نازشؔ

جس جادۂ پر ہول میں کہسار نہ ٹھہرے