ham-safar tha hi nahin raKHt-e-safar tha hi nahin

ham-safar thā hī nahīñ raḳht-e-safar thā hī nahīñ

kuchh gañvāne kā mujhe ḳhauf-o-ḳhatar thā hī nahīñ

mujh ko har shaam jahāñ le ke tavaqqo.a aa.ī

dar-o-dīvār to maujūd the ghar thā hī nahīñ

ungliyāñ zaḳhmī huiiñ tab mujhe ehsās huā

dastakeñ dī thiiñ jahāñ par vahāñ dar thā hī nahīñ

mujh se hī pūchhā kiye mere bikharne kā sabab

ahl-e-dānish meñ koī ahl-e-nazar thā hī nahīñ

dhuul uḌaa.ī jahāñ ḳhvāboñ meñ musalsal maiñ ne

kisī naqshe meñ kahīñ par vo nagar thā hī nahīñ

kis pe ilzām rakheñ kis pe lagā.eñ tohmat

merī miTTī meñ simaTne kā hunar thā hī nahīñ

yaad ik shaḳhs thā ik naam hī azbar 'tārā'

sivā us ke koī tā-hadd-e-nazar thā hī nahīñ

ham-safar tha hi nahin raKHt-e-safar tha hi nahin

kuchh ganwane ka mujhe KHauf-o-KHatar tha hi nahin

mujh ko har sham jahan le ke tawaqqoa aai

dar-o-diwar to maujud the ghar tha hi nahin

ungliyan zaKHmi huin tab mujhe ehsas hua

dastaken di thin jahan par wahan dar tha hi nahin

mujh se hi puchha kiye mere bikharne ka sabab

ahl-e-danish mein koi ahl-e-nazar tha hi nahin

dhul uDai jahan KHwabon mein musalsal main ne

kisi naqshe mein kahin par wo nagar tha hi nahin

kis pe ilzam rakhen kis pe lagaen tohmat

meri miTTi mein simaTne ka hunar tha hi nahin

yaad ek shaKHs tha ek nam hi azbar 'tara'

siwa us ke koi ta-hadd-e-nazar tha hi nahin