hum shayad kuchh DhunD rahe the yaad aaya to rote hain

ham shāyad kuchh DhūñD rahe the yaad aayā to rote haiñ

taaza taaza us ko kho kar jaane kyā kyā khote haiñ

ek taraf ye duniyā-dārī ek taraf vo ḳhalvat-e-ġham

duniyā vaalo har mahfil meñ dekho ham bhī hote haiñ

pahlī kiran kā dhaḌkā kyā kyā dil ko masaktā jaa.e hai

bhor bha.e jab kunj meñ ġhunche muñh shabnam se dhote haiñ

tujh ko tire gul phuul mubārak yaañ zid Thahrī jiine se

ham to apnī raah meñ pyāre chun chun kāñTe bote haiñ

tere dukh-sukh tū hī jaane ham ne bas itnā jaanā hai

tujh se pahle jaag uThte haiñ tere ba.ad hī sote haiñ

sej ko suunā kar ga.e ḳhūbāñ shikan shikan fariyād kare

pahlū pahlū chauñk uThe ham karvaT karvaT rote haiñ

us ne baaġh se jaate jaate mausam-e-gul bhī bāñdh liyā

'shāz' ko dekho dīvāne haiñ baiThe haar pirote haiñ

hum shayad kuchh DhunD rahe the yaad aaya to rote hain

taza taza us ko kho kar jaane kya kya khote hain

ek taraf ye duniya-dari ek taraf wo KHalwat-e-gham

duniya walo har mahfil mein dekho hum bhi hote hain

pahli kiran ka dhaDka kya kya dil ko masakta jae hai

bhor bhae jab kunj mein ghunche munh shabnam se dhote hain

tujh ko tere gul phul mubarak yan zid Thahri jine se

hum to apni rah mein pyare chun chun kanTe bote hain

tere dukh-sukh tu hi jaane hum ne bas itna jaana hai

tujh se pahle jag uThte hain tere baad hi sote hain

sej ko suna kar gae KHuban shikan shikan fariyaad kare

pahlu pahlu chaunk uThe hum karwaT karwaT rote hain

us ne bagh se jate jate mausam-e-gul bhi bandh liya

'shaz' ko dekho diwane hain baiThe haar pirote hain