hum Thaharne ke nahin umr-e-rawan rakhte hain

ham Thaharne ke nahīñ umr-e-ravāñ rakhte haiñ

vo zamīñ ghūmtī hai paañv jahāñ rakhte haiñ

dekhte sab haiñ magar band zabāñ rakhte haiñ

is tarah shahr meñ ham amn-o-amāñ rakhte haiñ

dil laraztā hai to Darte haiñ kahīñ TuuT na jaa.e

shāḳh par ek hī to barg-e-ḳhizāñ rakhte haiñ

DhūñD letā hai har ek shaḳhs hameñ ham shāyad

apne hone kā kahīñ koī nishāñ rakhte haiñ

kyuuñ nahīñ ḳhāna-ba-doshoñ kī tarah jī lete

rehn rakhne ke liye ham bhī makāñ rakhte haiñ

bhuul jā paḌh ke purānoñ kī purānī bāteñ

ab vo sarmāya na.e log kahāñ rakhte haiñ

ishq kī ibtidā aur intihā ham se pūchho

phuul ko chuum ke kāñToñ pe zabāñ rakhte haiñ

hum Thaharne ke nahin umr-e-rawan rakhte hain

wo zamin ghumti hai panw jahan rakhte hain

dekhte sab hain magar band zaban rakhte hain

is tarah shahr mein hum amn-o-aman rakhte hain

dil larazta hai to Darte hain kahin TuT na jae

shaKH par ek hi to barg-e-KHizan rakhte hain

DhunD leta hai har ek shaKHs hamein hum shayad

apne hone ka kahin koi nishan rakhte hain

kyun nahin KHana-ba-doshon ki tarah ji lete

rehn rakhne ke liye hum bhi makan rakhte hain

bhul ja paDh ke puranon ki purani baaten

ab wo sarmaya nae log kahan rakhte hain

ishq ki ibtida aur intiha hum se puchho

phul ko chum ke kanTon pe zaban rakhte hain