hum tera hijr manane ke liye nikle hain

ham tirā hijr manāne ke liye nikle haiñ

shahr meñ aag lagāne ke liye nikle haiñ

shahr kūchoñ meñ karo hashr bapā aaj ki ham

us ke va.adoñ ko bhulāne ke liye nikle haiñ

ham se jo ruuTh gayā hai vo bahut hai ma.asūm

ham to auroñ ko manāne ke liye nikle haiñ

shahr meñ shor hai vo yuuñ ki gumāñ ke safarī

apne hī aap meñ aane ke liye nikle haiñ

vo jo the shahr-e-tahayyur tire pur-fan me.amār

vahī pur-fan tujhe Dhāne ke liye nikle haiñ

rahguzar meñ tirī qālīn bichhāne vaale

ḳhuun kā farsh bichhāne ke liye nikle haiñ

hameñ karnā hai ḳhudāvand kī imdād so ham

dair-o-ka.aba ko laḌāne ke liye nikle haiñ

sar-e-shab ik na.ī tamsīl bapā honī hai

aur ham parda uThāne ke liye nikle haiñ

hameñ sairāb na.ī nasl ko karnā hai so ham

ḳhuun meñ apne nahāne ke liye nikle haiñ

ham kahīñ ke bhī nahīñ par ye hai rūdād apnī

ham kahīñ se bhī na jaane ke liye nikle haiñ

hum tera hijr manane ke liye nikle hain

shahr mein aag lagane ke liye nikle hain

shahr kuchon mein karo hashr bapa aaj ki hum

us ke wadon ko bhulane ke liye nikle hain

hum se jo ruTh gaya hai wo bahut hai masum

hum to auron ko manane ke liye nikle hain

shahr mein shor hai wo yun ki guman ke safari

apne hi aap mein aane ke liye nikle hain

wo jo the shahr-e-tahayyur tere pur-fan meamar

wahi pur-fan tujhe Dhane ke liye nikle hain

rahguzar mein teri qalin bichhane wale

KHun ka farsh bichhane ke liye nikle hain

hamein karna hai KHudawand ki imdad so hum

dair-o-kaba ko laDane ke liye nikle hain

sar-e-shab ek nai tamsil bapa honi hai

aur hum parda uThane ke liye nikle hain

hamein sairab nai nasl ko karna hai so hum

KHun mein apne nahane ke liye nikle hain

hum kahin ke bhi nahin par ye hai rudad apni

hum kahin se bhi na jaane ke liye nikle hain