ham-zad hai gham apna shadan kise kahte hain

ham-zād hai ġham apnā shādāñ kise kahte haiñ

vāqif nahīñ ishrat kā sāmāñ kise kahte haiñ

bīmār-e-mohabbat haiñ ham tārik-e-rāhat haiñ

nā-vāqif-e-sehat haiñ darmāñ kise kahte haiñ

muddat se ye sāmāñ hai tan sho.ala-e-uryāñ hai

kyā chiiz garebāñ hai dāmāñ kise kahte haiñ

māthe pe pasīna hai qudrat kā tamāshā hai

tāroñ kī jhamak kyā hai afshāñ kise kahte haiñ

dil de ke jafā sahiye aafat meñ phañse rahiye

daanā jo hameñ kahiye nādāñ kise kahte haiñ

jab yaar ne dekhā hai ik zaḳhm lagāyā hai

sau tīroñ kā dastā hai mizhgāñ kise kahte haiñ

us turk kī palkoñ se mahfūz ḳhudā rakkhe

bar kaTte haiñ tīroñ kī paikāñ kise kahte haiñ

dil kī jo zarā.at hai ḳhār-o-ḳhas-e-zahmat se

ik qatre kī hasrat hai bārāñ kise kahte haiñ

sach kahte haiñ ye zīrak hai ishq-e-junūñ be-shak

vāqif na the ham gul tak zindāñ kise kahte haiñ

har-vaqt hai be-zārī har dam hai jafākārī

dil-jūī-o-dildārī-e-jānāñ kise kahte haiñ

ruḳhsār kā shaidā huuñ kyā gul ko samajhtā huuñ

mahv-e-ḳhat-e-zebā huuñ raihāñ kise kahte haiñ

muddat se hai dil barham sohbat se nahīñ mahram

āzād haiñ ghar se ham mehmāñ kise kahte haiñ

jaate haiñ kabhī dargāh shīvāle meñ bhī hai raah

maz.hab se nahīñ āgāh īmāñ kise kahte haiñ

haidar se tavallā hai rahmat kā bharosā hai

ai 'bahr' ḳhatā kyā hai isyāñ kise kahte haiñ

ham-zad hai gham apna shadan kise kahte hain

waqif nahin ishrat ka saman kise kahte hain

bimar-e-mohabbat hain hum tarik-e-rahat hain

na-waqif-e-sehat hain darman kise kahte hain

muddat se ye saman hai tan shoala-e-uryan hai

kya chiz gareban hai daman kise kahte hain

mathe pe pasina hai qudrat ka tamasha hai

taron ki jhamak kya hai afshan kise kahte hain

dil de ke jafa sahiye aafat mein phanse rahiye

dana jo hamein kahiye nadan kise kahte hain

jab yar ne dekha hai ek zaKHm lagaya hai

sau tiron ka dasta hai mizhgan kise kahte hain

us turk ki palkon se mahfuz KHuda rakkhe

bar kaTte hain tiron ki paikan kise kahte hain

dil ki jo zaraat hai KHar-o-KHas-e-zahmat se

ek qatre ki hasrat hai baran kise kahte hain

sach kahte hain ye zirak hai ishq-e-junun be-shak

waqif na the hum gul tak zindan kise kahte hain

har-waqt hai be-zari har dam hai jafakari

dil-jui-o-dildari-e-jaanan kise kahte hain

ruKHsar ka shaida hun kya gul ko samajhta hun

mahw-e-KHat-e-zeba hun raihan kise kahte hain

muddat se hai dil barham sohbat se nahin mahram

aazad hain ghar se hum mehman kise kahte hain

jate hain kabhi dargah shiwale mein bhi hai rah

mazhab se nahin aagah iman kise kahte hain

haidar se tawalla hai rahmat ka bharosa hai

ai 'bahr' KHata kya hai isyan kise kahte hain