hamara KHwab kuchh kuchh aur hai tabir aankhon mein

hamārā ḳhvāb kuchh kuchh aur hai tā'bīr āñkhoñ meñ

liye phirte haiñ shāyad ham ġhalat tasvīr āñkhoñ meñ

bahut haiñ tang ham āvārgī-e-dīd se apnī

koī sūrat nahīñ jo Daal de zanjīr āñkhoñ meñ

'ajab majlis azā kī hai ki majma' kam nahīñ hotā

musalsal āñsuoñ kī hai vahī taqrīr āñkhoñ meñ

mohabbat dekhnī ho to un āñkhoñ par nazar rakkho

achānak hī ubhar aatī hai ye tahrīr āñkhoñ meñ

bhulā baiThā huuñ saare ḳhvāb jo kal raat dekhe the

ki merī sub.h ne kar dī bahut tāḳhīr āñkhoñ meñ

usī se mere din ke ḳhvāb ko tā'bīr miltī hai

maiñ saarī raat kartā huuñ jo kuchh tā'mīr āñkhoñ meñ

kuchh itnī zor se bhīñchā hai āġhosh-e-ḳhamoshī ne

ki khiñch kar aa ga.ī lafzoñ kī sab tāsīr āñkhoñ meñ

hamara KHwab kuchh kuchh aur hai ta'bir aankhon mein

liye phirte hain shayad hum ghalat taswir aankhon mein

bahut hain tang hum aawargi-e-did se apni

koi surat nahin jo Dal de zanjir aankhon mein

'ajab majlis aza ki hai ki majma' kam nahin hota

musalsal aansuon ki hai wahi taqrir aankhon mein

mohabbat dekhni ho to un aankhon par nazar rakkho

achanak hi ubhar aati hai ye tahrir aankhon mein

bhula baiTha hun sare KHwab jo kal raat dekhe the

ki meri subh ne kar di bahut taKHir aankhon mein

usi se mere din ke KHwab ko ta'bir milti hai

main sari raat karta hun jo kuchh ta'mir aankhon mein

kuchh itni zor se bhincha hai aaghosh-e-KHamoshi ne

ki khinch kar aa gai lafzon ki sab tasir aankhon mein