ہمارے دشت کے ذروں میں گم ہے پہنائی

ہمارے دشت کے ذروں میں گم ہے پہنائی

انہی میں ڈھونڈئیے میدان آبلہ پائی

وکیل کفر تھا کل گویا قصر کابل میں

وہیں سے سورۃ النصر کی صدا آئی

جنون دجل میں شہزادہ شہر ساز ہے اب

وہ بد نصیب کہ تھا اصل میں تو صحرائی

ہدف ہیں خلجی و اورنگ زیب اور آزاد

کہ ان کا جرم تھا اپنے وطن کی یکجائی

ہزار نکتے کئے ذہن نے نئے پیدا

کسی کے کام نہ آئی مگر یہ دانائی

میں اس جہان میں کوئی مثال بن نہ سکا

معاشرے نے عطا کی ہے مجھ کو تنہائی

ادھر تو ایشیا بھی کوہ برف ہے طارقؔ

سفید ساحتوں میں سوچ بھی ہے سرمائی