ہمارے حصے میں جب سے آیا ہوئی ہے وحشت بے چارے غم کو

ہمارے حصے میں جب سے آیا ہوئی ہے وحشت بے چارے غم کو

نہ جانے ہم سے ہے عشق کتنا نہ جانے کتنے ہیں پیارے غم کو

چبا کے لفظوں کو تھوک ڈالا زبانیں آنکھوں کی کاٹ ڈالیں

کوئی نہیں اب سمجھ سکے گا ہماری وحشت ہمارے غم کو

خیال میں تھا نہ خواب میں تھا جو ان سے مل کر ہوا ہے ہم سے

ہر ایک دکھ کو بھلا دیا ہے لگا دیا ہے کنارے غم کو

کہ جیسے بچوں کو ڈانٹ کر ہم سدھار دیتے ہیں ویسے ہی کچھ

کوئی تو پیٹے کوئی تو ڈانٹے کوئی تو آخر سدھارے غم کو

تمام فکریں جبیں سے اپنی اتار پھینکی تھیں ہم نے لیکن

عجیب ہے سر پہ چڑھ گیا ہے وہاں سے کوئی اتارے غم کو