hamare KHadshat ke daron se muhib sae nikal rahe hain

hamāre ḳhadshāt ke daroñ se muhīb saa.e nikal rahe haiñ

tumhāre vā'doñ ke chāñd lekin chamak rahe haiñ na Dhal rahe haiñ

'ajīb tārīk raushnī hai jo saare manzar ko khā rahī hai

ġhulām zehnoñ kī zid hai lekin ki dard ke din badal rahe haiñ

bisāt-e-shāhī pe in piyādoñ kī haisiyat hī nahīñ hai koī

ye jo bahut tilmilā rahe haiñ jo qad se baḌh ke uchhal rahe haiñ

vo jin ke hāthoñ hamārī dastār tak salāmat nahīñ rahī hai

sitam to ye hai inhī kī uñglī pakaḌ ke ham log chal rahe haiñ

tumhāre mere tamām aañsū jo vaqt kī dhuul par gire the

hamāre bachchoñ tak aan pahuñche haiñ in kī āñkhoñ meñ jal rahe haiñ

hamārī āñkheñ pahāḌ ke dūsrī taraf dekhtī haiñ 'anvar'

hamāre derīna ḳhvāb tā'bīr dekhne ko machal rahe haiñ

hamare KHadshat ke daron se muhib sae nikal rahe hain

tumhaare wa'don ke chand lekin chamak rahe hain na Dhal rahe hain

'ajib tarik raushni hai jo sare manzar ko kha rahi hai

ghulam zehnon ki zid hai lekin ki dard ke din badal rahe hain

bisat-e-shahi pe in piyaadon ki haisiyat hi nahin hai koi

ye jo bahut tilmila rahe hain jo qad se baDh ke uchhal rahe hain

wo jin ke hathon hamari dastar tak salamat nahin rahi hai

sitam to ye hai inhi ki ungli pakaD ke hum log chal rahe hain

tumhaare mere tamam aansu jo waqt ki dhul par gire the

hamare bachchon tak aan pahunche hain in ki aankhon mein jal rahe hain

hamari aankhen pahaD ke dusri taraf dekhti hain 'anwar'

hamare derina KHwab ta'bir dekhne ko machal rahe hain