hamare pyar ka hum ko sila nahin milta

hamāre pyaar kā ham ko sila nahīñ miltā

vafā kareñ to koī bā-vafā nahīñ miltā

har ik maqām pe matlab-parast milte haiñ

koī rafīq koī rahnumā nahīñ miltā

kisī ke sāmne dast-e-talab se kyā hāsil

ḳhudā se maañg ke dekho to kyā nahīñ miltā

vafā ḳhulūs kitāboñ meñ rah ga.e baaqī

jahāñ meñ dekhiye un kā pata nahīñ miltā

ye māl-o-zar se to duniyā ḳharīd sakte haiñ

sukūn-e-qalb-o-jigar mol kā nahīñ miltā

ġharīb logoñ kī bastī jalā.ī jaatī hai

bujhāne vaalā koī devtā nahīñ miltā

ġharaz ke vāste 'nāzim' hazār milte haiñ

koī habīb koī āshnā nahīñ miltā

hamare pyar ka hum ko sila nahin milta

wafa karen to koi ba-wafa nahin milta

har ek maqam pe matlab-parast milte hain

koi rafiq koi rahnuma nahin milta

kisi ke samne dast-e-talab se kya hasil

KHuda se mang ke dekho to kya nahin milta

wafa KHulus kitabon mein rah gae baqi

jahan mein dekhiye un ka pata nahin milta

ye mal-o-zar se to duniya KHarid sakte hain

sukun-e-qalb-o-jigar mol ka nahin milta

gharib logon ki basti jalai jati hai

bujhane wala koi dewta nahin milta

gharaz ke waste 'nazim' hazar milte hain

koi habib koi aashna nahin milta