hamare shahr mein kuchh log humse jalte hain

hamāre shahr meñ kuchh log ham se jalte haiñ

yahī sabab hai ki ham sar uThā ke chalte haiñ

sitamgarī to koī dekhe mah-jabīnoñ kī

ki chuTkiyoñ se mire dil ko vo masalte haiñ

ye kār-gāh-e-junūñ bhī 'ajīb duniyā hai

ki is ke saa.e meñ har inqalāb palte haiñ

tumhārī sūrat-e-zebā ko dekhne ke liye

vufūr-e-shauq meñ ḳhud aa.ine machalte haiñ

sitamgarān-e-jahāñ deñ na dhamkiyāñ ham ko

ham ahl-e-'ishq haiñ sho'loñ pe roz chalte haiñ

hamare shahr mein kuchh log hum se jalte hain

yahi sabab hai ki hum sar uTha ke chalte hain

sitamgari to koi dekhe mah-jabinon ki

ki chuTkiyon se mere dil ko wo masalte hain

ye kar-gah-e-junun bhi 'ajib duniya hai

ki is ke sae mein har inqalab palte hain

tumhaari surat-e-zeba ko dekhne ke liye

wufur-e-shauq mein KHud aaine machalte hain

sitamgaran-e-jahan den na dhamkiyan hum ko

hum ahl-e-'ishq hain sho'lon pe roz chalte hain