hamari pyas ko itna jagaya hai muqaddar ne

hamārī pyaas ko itnā jagāyā hai muqaddar ne

ki ik qatre ko bhī dariyā banāyā hai muqaddar ne

kabhī tūfāñ se Takrā.e kabhī maujoñ se laḌ baiThe

hameñ hālāt se laḌnā sikhāyā hai muqaddar ne

hamārī chāhatoñ kī shab bhī guzrī vaqt se pahle

hameñ ik ḳhvāb aisā bhī dikhāyā hai muqaddar ne

na koī aarzū hai ab na koī justujū mujh ko

mujhe kyuuñ zindagī se ab milāyā hai muqaddar ne

jahāñ manzil to hāsil hai magar apnā nahīñ koī

mujhe kyuuñ aise rastoñ par chalāyā hai muqaddar ne

rulāyā hai satāyā hai jalāyā hai ki ai 'tālib'

sitam kā har tarīqa āzmāyā hai muqaddar ne

hamari pyas ko itna jagaya hai muqaddar ne

ki ek qatre ko bhi dariya banaya hai muqaddar ne

kabhi tufan se Takrae kabhi maujon se laD baiThe

hamein haalat se laDna sikhaya hai muqaddar ne

hamari chahaton ki shab bhi guzri waqt se pahle

hamein ek KHwab aisa bhi dikhaya hai muqaddar ne

na koi aarzu hai ab na koi justuju mujh ko

mujhe kyun zindagi se ab milaya hai muqaddar ne

jahan manzil to hasil hai magar apna nahin koi

mujhe kyun aise raston par chalaya hai muqaddar ne

rulaya hai sataya hai jalaya hai ki ai 'talib'

sitam ka har tariqa aazmaya hai muqaddar ne