hamein jab apna taaruf karana paDta hai

hameñ jab apnā ta.āruf karānā paḌtā hai

na jaane kitne dukhoñ ko dabānā paḌtā hai

ab aa rahā ho koī jism is tasavvuf se

to ham ko halqa-e-bai.at baḌhānā paḌtā hai

kisī ko niiñd na aatī ho raushnī meñ agar

to ḳhud charāġh-e-mohabbat bujhānā paḌtā hai

bahut ziyāda haiñ ḳhatre badan kī mahfil meñ

par apnī ek hī mahfil hai jaanā paḌtā hai

ḳhudā hai qādir-e-mutlaq ye baat khultī hai tab

jab us se kaam koī kāfirāna paḌtā hai

bahut ziyāda ḳhushī se vafāt pā gayā ho

to aise dil ko dukhā kar jilānā paḌtā hai

hamāre paas yahī shā.irī kā sikka hai

ulaT-palaT ke isī ko chalānā paḌtā hai

sunā hai tum mire dil kī taraf se guzre the

isī taraf to mirā kārḳhāna paḌtā hai

ajiib tarz-e-taġhazzul hai ye miyāñ 'ehsās'

ki jism-o-rūh ko ik sur meñ gaanā paḌtā hai

hamein jab apna taaruf karana paDta hai

na jaane kitne dukhon ko dabana paDta hai

ab aa raha ho koi jism is tasawwuf se

to hum ko halqa-e-baiat baDhana paDta hai

kisi ko nind na aati ho raushni mein agar

to KHud charagh-e-mohabbat bujhana paDta hai

bahut ziyaada hain KHatre badan ki mahfil mein

par apni ek hi mahfil hai jaana paDta hai

KHuda hai qadir-e-mutlaq ye baat khulti hai tab

jab us se kaam koi kafirana paDta hai

bahut ziyaada KHushi se wafat pa gaya ho

to aise dil ko dukha kar jilana paDta hai

hamare pas yahi shairi ka sikka hai

ulaT-palaT ke isi ko chalana paDta hai

suna hai tum mere dil ki taraf se guzre the

isi taraf to mera karKHana paDta hai

ajib tarz-e-taghazzul hai ye miyan 'ehsas'

ki jism-o-ruh ko ek sur mein gana paDta hai