hamein na aaj kisi gham pe jab hansi aai

hameñ na aaj kisī ġham pe jab hañsī aa.ī

to umr-e-rafta ne āvāz dī abhī aa.ī

hue haiñ mahv ham aise ki der tak ham ko

kisī ne dekhā to nazroñ meñ be-ruḳhī aa.ī

ga.ī thī saath vahāñ tak to dil kī betābi

hamāre saath kahāñ se ye be-dilī aa.ī

vo inqilāb-e-dil-e-dost aaj bhī na huā

ki jis ko dekhne ik 'umr lauT sī aa.ī

usī kī uchTī sī bāteñ jo aaj us se kahīñ

to der tak na suḳhan meñ shaguftagī aa.ī

vahī sadā mujhe ab ajnabī sī lagtī hai

hayāt-e-rafta palaT ab kaThin ghaḌī aa.ī

nigāh-e-dost bahut apnā haal jaan liyā

jo tujh meñ dard-bharī be-tavajjohī aa.ī

ḳhayāl-e-pursish-e-ġham to use bhī hai ai dil

tire nasīb jo ab tak na vo ghaḌī aa.ī

dil aur dard meñ barsoñ kī Than ga.ī hai yahāñ

kisī ke hone na hone se kyā kamī aa.ī

ye dil se uTh ke jo dard aa basā hai āñkhoñ meñ

na jaane yaad hameñ kaun sī ghaḌī aa.ī

lagī huī thiiñ ye āñkheñ bahut jo tum pe to aaj

unhīñ meñ ham ko nazar apnī be-kasī aa.ī

bil-āḳhir apne mizājoñ ke ho rahe qaa.il

agarche terī adāoñ kī yaad bhī aa.ī

qadam-qadam pe vo terī umiid sī kī nigāh

palaT ke rāste-bhar tujh ko dekhtī aa.ī

usī ke rang meñ ham aaj us se mil baiThe

usī ke sāmne aaj us kī sādgī aa.ī

yahāñ to ashk bhar aa.e ba-yād-e-pursish-e-ġham

vahāñ na jaane un āñkhoñ meñ kyoñ namī aa.ī

hamārī bazm-e-tasavvur meñ vo nigah na thī shoḳh

yahāñ to jab bhī vo aa.ī jhukī-jhukī aa.ī

kisī ko dekh ke tanhā.ī jaag uThtī hai

ki ye hai jis ke baġhair is qadar kamī aa.ī

ham apne dard ko anmol jānte the 'talḳh'

hameñ hayāt muravvat meñ bech bhī aa.ī

hamein na aaj kisi gham pe jab hansi aai

to umr-e-rafta ne aawaz di abhi aai

hue hain mahw hum aise ki der tak hum ko

kisi ne dekha to nazron mein be-ruKHi aai

gai thi sath wahan tak to dil ki betabi

hamare sath kahan se ye be-dili aai

wo inqilab-e-dil-e-dost aaj bhi na hua

ki jis ko dekhne ek 'umr lauT si aai

usi ki uchTi si baaten jo aaj us se kahin

to der tak na suKHan mein shaguftagi aai

wahi sada mujhe ab ajnabi si lagti hai

hayat-e-rafta palaT ab kaThin ghaDi aai

nigah-e-dost bahut apna haal jaan liya

jo tujh mein dard-bhari be-tawajjohi aai

KHayal-e-pursish-e-gham to use bhi hai ai dil

tere nasib jo ab tak na wo ghaDi aai

dil aur dard mein barson ki Than gai hai yahan

kisi ke hone na hone se kya kami aai

ye dil se uTh ke jo dard aa basa hai aankhon mein

na jaane yaad hamein kaun si ghaDi aai

lagi hui thin ye aankhen bahut jo tum pe to aaj

unhin mein hum ko nazar apni be-kasi aai

bil-aKHir apne mizajon ke ho rahe qail

agarche teri adaon ki yaad bhi aai

qadam-qadam pe wo teri umid si ki nigah

palaT ke raste-bhar tujh ko dekhti aai

usi ke rang mein hum aaj us se mil baiThe

usi ke samne aaj us ki sadgi aai

yahan to ashk bhar aae ba-yaad-e-pursish-e-gham

wahan na jaane un aankhon mein kyon nami aai

hamari bazm-e-tasawwur mein wo nigah na thi shoKH

yahan to jab bhi wo aai jhuki-jhuki aai

kisi ko dekh ke tanhai jag uThti hai

ki ye hai jis ke baghair is qadar kami aai

hum apne dard ko anmol jaante the 'talKH'

hamein hayat murawwat mein bech bhi aai