hamein na buzdil samajhna dekho hum apna sab kuchh luTa chuke hain

hameñ na buzdil samajhnā dekho ham apnā sab kuchh luTā chuke haiñ

vatan kī miTTī hameñ pukāregī us se pahle ham aa chuke haiñ

falak se ūñche qadoñ ke mālik the 'mīr' 'faiz' aur 'firāq' 'jālib'

qasīde hākim ke dar pe paḌh kar ham apne qad ko ghaTā chuke haiñ

tumheñ to ghar baiThe mil gayā sab tumhāre kāñdhoñ pe bojh kyā hai

charāġh-e-‘ilm-o-hunar to yaaro jalāne vaale jalā chuke haiñ

hamārī nasloñ ke qatl par bhī zabān jin kī nahīñ khulegī

ham aise gūñge muhāfizoñ ko ḳhatīb-e-mimber banā chuke haiñ

'azāb sar se guzar gayā tum janāb-e-'āqib' ab aa rahe ho

hameñ nahīñ hai tumhārī hājat ham apnī lāsheñ uThā chuke haiñ

hamein na buzdil samajhna dekho hum apna sab kuchh luTa chuke hain

watan ki miTTi hamein pukaregi us se pahle hum aa chuke hain

falak se unche qadon ke malik the 'mir' 'faiz' aur 'firaq' 'jalib'

qaside hakim ke dar pe paDh kar hum apne qad ko ghaTa chuke hain

tumhein to ghar baiThe mil gaya sab tumhaare kandhon pe bojh kya hai

charagh-e-‘ilm-o-hunar to yaro jalane wale jala chuke hain

hamari naslon ke qatl par bhi zaban jin ki nahin khulegi

hum aise gunge muhafizon ko KHatib-e-mimber bana chuke hain

'azab sar se guzar gaya tum janab-e-'aqib' ab aa rahe ho

hamein nahin hai tumhaari hajat hum apni lashen uTha chuke hain