hansi labon pe hai dil mein shaguftagi to nahin

hañsī laboñ pe hai dil meñ shaguftagī to nahīñ

ye ik latīf sā dhoka hai zindagī to nahīñ

samajh rahā huuñ ki apnā banā liyā hai unheñ

isī kā naam mohabbat kī sādgī to nahīñ

lagā rahā huuñ laboñ kī hañsī se andāza

ki mere ġham kī talab meñ koī kamī to nahīñ

nafas nafas pe ye hotā hai kyuuñ mujhe mahsūs

hayāt tujh se alag rah ke ḳhud-kushī to nahīñ

mire qarīb se begāna-vār guzrā hai

maiñ ajnabī use samjhūñ vo ajnabī to nahīñ

ye kis liye mirī āñkhoñ meñ aa ga.e aañsū

ḳhayāl-e-ḳhātir-e-ahbāb meñ kamī to nahīñ

ye kis ḳhushī meñ manāte haiñ jashn ahl-e-chaman

kalī kā ḳhuun huā hai kalī hañsī to nahīñ

nafas nafas meñ hai mānūs nik.hatoñ kā ḳhirām

chhupā huā koī mere qarīb hī to nahīñ

samajh rahā huuñ jise barq kī chamak 'shā.ir'

kahīñ vo mere nasheman kī raushnī to nahīñ

hansi labon pe hai dil mein shaguftagi to nahin

ye ek latif sa dhoka hai zindagi to nahin

samajh raha hun ki apna bana liya hai unhen

isi ka nam mohabbat ki sadgi to nahin

laga raha hun labon ki hansi se andaza

ki mere gham ki talab mein koi kami to nahin

nafas nafas pe ye hota hai kyun mujhe mahsus

hayat tujh se alag rah ke KHud-kushi to nahin

mere qarib se begana-war guzra hai

main ajnabi use samjhun wo ajnabi to nahin

ye kis liye meri aankhon mein aa gae aansu

KHayal-e-KHatir-e-ahbab mein kami to nahin

ye kis KHushi mein manate hain jashn ahl-e-chaman

kali ka KHun hua hai kali hansi to nahin

nafas nafas mein hai manus nikhaton ka KHiram

chhupa hua koi mere qarib hi to nahin

samajh raha hun jise barq ki chamak 'shair'

kahin wo mere nasheman ki raushni to nahin