hansi thi lab pe chashm-e-nam se pahle

hañsī thī lab pe chashm-e-nam se pahle

tumhāre hijr ke is ġham se pahle

ye mausīqī to kal kā mājrā hai

mirī āvāz thī sargam se pahle

zamāne se hai sīkhā ye hunar kyā

thī vāzeh guftugū mub.ham se pahle

yaqīñ thā har ḳhushī hai jāvedānī

tire baḳhshe ġham-e-paiham se pahle

bas ab rahtā hai dil meñ ranj terā

tirī tasvīr thī is ġham se pahle

'ajab aaseb thā ḳhāmoshiyoñ kā

mirī paa.el kī is chham-chham se pahle

lagī rahtī hai daa.im jaañ kī baazī

thā zahr-e-‘ishq zahr-e-ġham se pahle

bahāroñ kā samāñ rahtā thā paiham

tumhāre hijr ke mausam se pahle

sañvartī hī nahīñ jo zulf terī

bahut āsāñ thī pech-o-ḳham se pahle

nishāna kaun thā kis kis ko tum ne

asiir apnā kiyā thā ham se pahle

tumhāre naam kī thī guuñj paiham

mirī sāñsoñ meñ zer-o-bam se pahle

kisī sayyāre par rahte the ham tum

vujūd-e-havvā-o-ādam se pahle

na thī shāhī se kam merī faqīrī

mirā kaasa thā jām-e-jam se pahle

balā-e-'ishq tab lāhaq nahīñ thī

suhūlat thī bahut jokham se pahle

yahāñ aa.e ga.e 'nasrīn' kitne

mohabbat karne vaale ham se pahle

hansi thi lab pe chashm-e-nam se pahle

tumhaare hijr ke is gham se pahle

ye mausiqi to kal ka majra hai

meri aawaz thi sargam se pahle

zamane se hai sikha ye hunar kya

thi wazeh guftugu mubham se pahle

yaqin tha har KHushi hai jawedani

tere baKHshe gham-e-paiham se pahle

bas ab rahta hai dil mein ranj tera

teri taswir thi is gham se pahle

'ajab aaseb tha KHamoshiyon ka

meri pael ki is chham-chham se pahle

lagi rahti hai daim jaan ki bazi

tha zahr-e-‘ishq zahr-e-gham se pahle

bahaaron ka saman rahta tha paiham

tumhaare hijr ke mausam se pahle

sanwarti hi nahin jo zulf teri

bahut aasan thi pech-o-KHam se pahle

nishana kaun tha kis kis ko tum ne

asir apna kiya tha hum se pahle

tumhaare nam ki thi gunj paiham

meri sanson mein zer-o-bam se pahle

kisi sayyare par rahte the hum tum

wujud-e-hawwa-o-adam se pahle

na thi shahi se kam meri faqiri

mera kasa tha jam-e-jam se pahle

bala-e-'ishq tab lahaq nahin thi

suhulat thi bahut jokham se pahle

yahan aae gae 'nasrin' kitne

mohabbat karne wale hum se pahle