haqiqatan to wo ehsan kar raha hai bahut

haqīqatan to vo ehsān kar rahā hai bahut

jo ḳhāmiyoñ pe mirī mujh ko Toktā hai bahut

nahīñ haiñ be-ḳhabar ik dūsre ke haal se ham

hamāre darmiyāñ itnā bhī rābta hai bahut

koī dikhā.e na ab ‘aks dūsrā ham ko

hamāre sāmne apnā hī aa.ina hai bahut

ye baat alag ki na.ī qadr kā hai dil-dāda

rivāyatoñ se bhī lekin vo āshnā hai bahut

fasāna merā 'sahar' kyā pasand aa.e unheñ

haqīqatoñ ne use talḳh kar diyā hai bahut

haqiqatan to wo ehsan kar raha hai bahut

jo KHamiyon pe meri mujh ko Tokta hai bahut

nahin hain be-KHabar ek dusre ke haal se hum

hamare darmiyan itna bhi rabta hai bahut

koi dikhae na ab ‘aks dusra hum ko

hamare samne apna hi aaina hai bahut

ye baat alag ki nai qadr ka hai dil-dada

riwayaton se bhi lekin wo aashna hai bahut

fasana mera 'sahar' kya pasand aae unhen

haqiqaton ne use talKH kar diya hai bahut