har aane wale pal se Dar raha hun

har aane vaale pal se Dar rahā huuñ

kin andeshoñ meñ ghir kar rah gayā huuñ

kisī pyāsī nadī kī bad-duā huuñ

samundar thā magar sahrā huā huuñ

bas ab anjām kyā hai ye batā do

bahut lambī kahānī ho gayā huuñ

vahī mere liye ab ajnabī haiñ

maiñ jin ke saath sadiyoñ tak rahā huuñ

koī anhonī ho jā.egī jaise

maiñ ab aisī hī bāteñ sochtā huuñ

khaḌī ho maut darvāze pe jaise

maiñ ghar meñ huuñ magar sahmā huā huuñ

abhī kuchh der pahle chup lagī thī

tumheñ hamdard pā kar ro diyā huuñ

maiñ koī shahr huuñ sadiyoñ purānā

hazāroñ baar ujḌā huuñ basā huuñ

mirā ab koī mustaqbil nahīñ hai

maiñ ab maazī meñ apne jī rahā huuñ

mujhe shāyad bhulā paa.e na duniyā

maiñ apne ahd kā ik hādsa huuñ

salāmat huuñ ba-zāhir lekin 'arshad'

maiñ andar se bahut TuuTā huā huuñ

har aane wale pal se Dar raha hun

kin andeshon mein ghir kar rah gaya hun

kisi pyasi nadi ki bad-dua hun

samundar tha magar sahra hua hun

bas ab anjam kya hai ye bata do

bahut lambi kahani ho gaya hun

wahi mere liye ab ajnabi hain

main jin ke sath sadiyon tak raha hun

koi anhoni ho jaegi jaise

main ab aisi hi baaten sochta hun

khaDi ho maut darwaze pe jaise

main ghar mein hun magar sahma hua hun

abhi kuchh der pahle chup lagi thi

tumhein hamdard pa kar ro diya hun

main koi shahr hun sadiyon purana

hazaron bar ujDa hun basa hun

mera ab koi mustaqbil nahin hai

main ab mazi mein apne ji raha hun

mujhe shayad bhula pae na duniya

main apne ahd ka ek hadsa hun

salamat hun ba-zahir lekin 'arshad'

main andar se bahut TuTa hua hun