har badan ko ab yahan aisa gahan lagne laga

har badan ko ab yahāñ aisā gahan lagne lagā

jis ko dekho ab vahī be-pairahan lagne lagā

jab se Dhālā hai sitāroñ meñ nigāh-e-shauq ko

chāñd se baḌh kar tumhārā bāñkpan lagne lagā

merī jānib pyaar se dekhe na koī ik nazar

halqa-e-ahbāb terī anjuman lagne lagā

zinda lāshoñ kī tarah lagne lagī insāniyat

pairahan ab ādamiyat kā kafan lagne lagā

maiñ ne rakkhā hai hamesha apnī dhartī kā bharam

is liye bhī mujh se vo charḳh-e-kuhan lagne lagā

maiñ ne rakhā thā jahāñ par phuul tere naam kā

is zamīñ kā utnā hissa ab chaman lagne lagā

jab se sachchā.ī ke raste ko kiyā hai muntaḳhab

nok-e-ḳhanjar se chhiddā apnā badan lagne lagā

rafta rafta nok-e-ḳhāma par havas chhāne lagī

dhīre dhīre rā.egāñ kār-e-suḳhan lagne lagā

ye jo bāñdhā hai garebāñ se junūñ ke haath ko

ahl-e-dānish ko magar dīvāna-pan lagne lagā

jis gulistāñ par lahū chhiḌkā thā ham ne ai 'nabīl'

Daalī Daalī aaj vo ik dasht-e-ban lagne lagā

har badan ko ab yahan aisa gahan lagne laga

jis ko dekho ab wahi be-pairahan lagne laga

jab se Dhaala hai sitaron mein nigah-e-shauq ko

chand se baDh kar tumhaara bankpan lagne laga

meri jaanib pyar se dekhe na koi ek nazar

halqa-e-ahbab teri anjuman lagne laga

zinda lashon ki tarah lagne lagi insaniyat

pairahan ab aadamiyat ka kafan lagne laga

main ne rakkha hai hamesha apni dharti ka bharam

is liye bhi mujh se wo charKH-e-kuhan lagne laga

main ne rakha tha jahan par phul tere nam ka

is zamin ka utna hissa ab chaman lagne laga

jab se sachchai ke raste ko kiya hai muntaKHab

nok-e-KHanjar se chhidda apna badan lagne laga

rafta rafta nok-e-KHama par hawas chhane lagi

dhire dhire raegan kar-e-suKHan lagne laga

ye jo bandha hai gareban se junun ke hath ko

ahl-e-danish ko magar diwana-pan lagne laga

jis gulistan par lahu chhiDka tha hum ne ai 'nabil'

Dali Dali aaj wo ek dasht-e-ban lagne laga