ہر چند لہو اب تک ہر زخم سے جاری ہے

ہر چند لہو اب تک ہر زخم سے جاری ہے

پھر بھی دل دیوانہ پتھر کا پجاری ہے

ہم نے جو بیاباں میں اک رات گزاری ہے

اس شہر نگاراں کی ہر رات پہ بھاری ہے

اظہار ستم ان سے کرتے بھی تو کیا کرتے

شائستہ غم ہونا تہذیب ہماری ہے

زخموں کی نمائش سے دنیا کا تعلق کیا

تیرے ہی لیے میں نے یہ بزم سنواری ہے

پوجا ہے اسے میرا فن جان کے دنیا نے

میں نے جو زمانے کی تصویر اتاری ہے

کچھ لوگ پلٹ آئے گھبرا کے رہ غم سے

اب دیکھیے کیا ٹھہرے دیوانوں کی باری ہے

پوچھے تو کوئی آخر ان ہنستے گلابوں سے

آغوش میں کانٹوں کے کس طرح گزاری ہے

ہو جائیں نہ پھر شاداںؔ یادوں کے دیے روشن

اک عمر کے بعد اس نے پھر زلف سنواری ہے