har ek aankh ko zauq-e-jamal de ya-rab

har ek aañkh ko zauq-e-jamāl de yā-rab

diloñ ko ishq-o-vafā kā jalāl de yā-rab

hai mere zehn-e-rasā meñ jo ik tasavvur-e-haq

mirā qalam usī sāñche meñ Dhaal de yā-rab

zabāñ se baat jo nikle hamesha haq nikle

lisān-e-sidq ko husn-e-maqāl de yā-rab

is ahd-e-zor meñ is kā sañbhalnā mushkil hai

tū hī sharīfoñ kī pagḌī sañbhāl de yā-rab

khaTak rahā hai diloñ meñ mire harīfoñ ke

bahut dinoñ se jo kāñTā nikāl de yā-rab

nafas meñ garmī-e-īmān-e-būzar-o-salmāñ

diloñ meñ soz-e-uvais-o-bilāl de yā-rab

jo ḳhvāhishoñ meñ ghirā ho vo tujh se kyā māñge

tujhe jo denā hai vo be-savāl de yā-rab

har ek aankh ko zauq-e-jamal de ya-rab

dilon ko ishq-o-wafa ka jalal de ya-rab

hai mere zehn-e-rasa mein jo ek tasawwur-e-haq

mera qalam usi sanche mein Dhaal de ya-rab

zaban se baat jo nikle hamesha haq nikle

lisan-e-sidq ko husn-e-maqal de ya-rab

is ahd-e-zor mein is ka sanbhalna mushkil hai

tu hi sharifon ki pagDi sanbhaal de ya-rab

khaTak raha hai dilon mein mere harifon ke

bahut dinon se jo kanTa nikal de ya-rab

nafas mein garmi-e-iman-e-buzar-o-salman

dilon mein soz-e-uwais-o-bilal de ya-rab

jo KHwahishon mein ghira ho wo tujh se kya mange

tujhe jo dena hai wo be-sawal de ya-rab