ہر ایک سمت اشارہ تھے اور رستہ بھی

ہر ایک سمت اشارہ تھے اور رستہ بھی

ملال یہ ہے کہ آیا نہ ہم کو چلنا بھی

ہماری پیاس مکمل ہو تو قدم بھی اٹھیں

رکھے ہے سامنے دریا بھی اور صحرا بھی

بجھے چراغ تو حیرانیاں کچھ اور بڑھیں

ہمارے ساتھ ہے اب تک ہمارا سایہ بھی

اک ایسی لہر اٹھی ڈوبنے کا خوف گیا

اب ایک جیسے ہیں منجدھار بھی کنارہ بھی

سفر سے لوٹ تو آئے مگر نہ تھا معلوم

ہمارے ساتھ چلا آئے گا یے رستہ بھی

ہزار بار اسی کو دعاؤں میں مانگا

ہزار بار کیا اس کے در پہ سجدہ بھی