ہر ایک شعر میں دل کا قرار رکھ دینا

ہر ایک شعر میں دل کا قرار رکھ دینا

غزل میں اپنی سخن کا وقار رکھ دینا

وہ جس نے پیار سے دنیا پہ فتح پائی تھی

تو اس کے جیسا ہی لہجے میں پیار رکھ دینا

بھٹک نہ جائے کہیں کاروان اہل خرد

کوئی چراغ سر رہ گزار رکھ دینا

خزاں کے آنے سے پہلے چمن کے متوالو

گلوں کے رخ پہ لہو کی پھوار رکھ دینا

کبھی تو یاد کرے گا زمانہ پڑھ کے تجھے

ورق ورق پہ فسانے ہزار رکھ دینا

کوئی تو بات زمانے کے دل میں اترے گی

تو سب کے سامنے حق کی پکار رکھ دینا

یہیں سے قافلہ گزرے گا میری یادوں کا

یہیں کہیں پہ مرا انتظار رکھ دینا

دیار دل سے گزر جس گھڑی بھی ہو دلدارؔ

ملے نہ پھول تو اشکوں کے ہار رکھ دینا