har ghaDi ek yahi ehsas-e-ziyan rahta hai

har ghaḌī ik yahī ehsās-e-ziyāñ rahtā hai

aag raushan thī jahāñ sirf dhuāñ rahtā hai

ḳhatm hotā hī nahīñ dasht kā ab sannāTā

koī mausam ho yahāñ ek samāñ rahtā hai

aa ga.ī raas mire dil kī udāsī shāyad

itnī muddat bhī kahīñ daur-e-ḳhizāñ rahtā hai

phuul khilte haiñ to murjhā.e hue lagte haiñ

ik ajab ḳhauf sar-e-shāḳh-e-gumāñ rahtā hai

saaz ke taar haiñ TuuTe hue mutrib chup haiñ

ab fazāoñ meñ faqat shor-e-sagāñ rahtā hai

rāsta chalte hue log ThiThak jaate haiñ

har-qadam jaise tah-e-sañg-e-garāñ rahtā hai

maiñ bhī ruk jā.ūñ magar ruk nahīñ paatā 'ālam'

ek dariyā sā sadā mujh meñ ravāñ rahtā hai

har ghaDi ek yahi ehsas-e-ziyan rahta hai

aag raushan thi jahan sirf dhuan rahta hai

KHatm hota hi nahin dasht ka ab sannaTa

koi mausam ho yahan ek saman rahta hai

aa gai ras mere dil ki udasi shayad

itni muddat bhi kahin daur-e-KHizan rahta hai

phul khilte hain to murjhae hue lagte hain

ek ajab KHauf sar-e-shaKH-e-guman rahta hai

saz ke tar hain TuTe hue mutrib chup hain

ab fazaon mein faqat shor-e-sagan rahta hai

rasta chalte hue log ThiThak jate hain

har-qadam jaise tah-e-sang-e-garan rahta hai

main bhi ruk jaun magar ruk nahin pata 'alam'

ek dariya sa sada mujh mein rawan rahta hai