har ghane sae ko benam-o-nishan karta hua

har ghane saa.e ko benām-o-nishāñ kartā huā

vaqt guzrā ḳhvāb mere rā.egāñ kartā huā

kaun aatā hai mirī rātoñ ko karne mo'atabar

kaun jaatā hai mirī sham.eñ dhuāñ kartā huā

us ne hañste khelte phāñdī hai dīvār-e-yaqīñ

maiñ ki ḳhud ko phir rahā huuñ ḳhush-gumāñ kartā huā

kyā batā.ūñ kis tarah pesh aa.ī mujh se zindagī

so na jā.ūñ maiñ yahī qissa bayāñ kartā huā

merī bastī se hai guzrā ek lashkar is tarah

duudh piite bachchoñ ko mashq-e-sināñ kartā huā

sah rahā huuñ der se lā-samtiyat kā ik azaab

kaT gayā apnoñ se ḳhud ko āsmāñ kartā huā

kho ga.e gāḌhe dhueñ meñ shahr ke manzar tamām

ik parinda rah gayā āh-o-fuġhāñ kartā huā

kis ne rakkhī hai mirī āñkhoñ meñ ḳhvāboñ kī qatār

kaun ḳhvāhish dil kī jaatā hai javāñ kartā huā

har ghane sae ko benam-o-nishan karta hua

waqt guzra KHwab mere raegan karta hua

kaun aata hai meri raaton ko karne mo'atabar

kaun jata hai meri shamen dhuan karta hua

us ne hanste khelte phandi hai diwar-e-yaqin

main ki KHud ko phir raha hun KHush-guman karta hua

kya bataun kis tarah pesh aai mujh se zindagi

so na jaun main yahi qissa bayan karta hua

meri basti se hai guzra ek lashkar is tarah

dudh pite bachchon ko mashq-e-sinan karta hua

sah raha hun der se la-samtiyat ka ek azab

kaT gaya apnon se KHud ko aasman karta hua

kho gae gaDhe dhuen mein shahr ke manzar tamam

ek parinda rah gaya aah-o-fughan karta hua

kis ne rakkhi hai meri aankhon mein KHwabon ki qatar

kaun KHwahish dil ki jata hai jawan karta hua