har ek ko dusre se adawat hai aaj-kal

har ik ko dūsre se adāvat hai āj-kal

kohrām zindagī kī alāmat hai āj-kal

lab kholnā hī jurm-e-baġhāvat hai āj-kal

jailoñ meñ band shān-e-ḳhitābat hai āj-kal

sar pe pahan ke nikle haiñ dastār sab magar

izzat kahāñ kisī kī salāmat hai āj-kal

andar kī TuuT phuuT hai bikhrā huā huuñ maiñ

mujh ko bahut hī apnī zarūrat hai āj-kal

apnī ġharaz se miltā hai miltā hai jo koī

sach pūchhiye to kis ko mohabbat hai āj-kal

ham ne phir apnī aas ke ḳheme jalā diye

dar-pesh ham ko ik na.ī hijrat hai āj-kal

mahfil bhī un kī raas na aa.ī hameñ 'vakīl'

be-kaif sī ajiib tabī.at hai āj-kal

har ek ko dusre se adawat hai aaj-kal

kohram zindagi ki alamat hai aaj-kal

lab kholna hi jurm-e-baghawat hai aaj-kal

jailon mein band shan-e-KHitabat hai aaj-kal

sar pe pahan ke nikle hain dastar sab magar

izzat kahan kisi ki salamat hai aaj-kal

andar ki TuT phuT hai bikhra hua hun main

mujh ko bahut hi apni zarurat hai aaj-kal

apni gharaz se milta hai milta hai jo koi

sach puchhiye to kis ko mohabbat hai aaj-kal

hum ne phir apni aas ke KHeme jala diye

dar-pesh hum ko ek nai hijrat hai aaj-kal

mahfil bhi un ki ras na aai hamein 'wakil'

be-kaif si ajib tabiat hai aaj-kal