har ek maqam se guzrunga zindagi ke liye

har ik maqām se guzrūñgā zindagī ke liye

tamām ranj gavārā tirī ḳhushī ke liye

karam kiyā mirī jānib jo tum ne dekh liyā

taḌap rahā thā añdheroñ meñ raushnī ke liye

base hue haiñ unhīñ se tamām vīrāne

bahār DhūñD rahe the jo zindagī ke liye

baġhair dard kise kaun yaad kartā hai

yahīñ to ġham kī zarūrat hai aadmī ke liye

yaqīn hai ki sahar tak pahuñch hī jā.ūñgā

guzar rahā huuñ añdheroñ meñ raushnī ke liye

baġhair sa’y-e-musalsal to kuchh nahīñ hotā

junūñ bhī kitnā zarūrī hai āgahī ke liye

samajh chukā huuñ ki ādāb-e-dostī kyā haiñ

ḳhulūs-e-dil kī zarūrat hai dostī ke liye

na jaane kitne patangoñ ko kar diyā be-nūr

charāġh kis ne jalāyā hai raushnī ke liye

kisī ko husn diyā hai kisī ko 'ishq 'fidā'

har ek chiiz nahīñ hai har ik kisī ke liye

har ek maqam se guzrunga zindagi ke liye

tamam ranj gawara teri KHushi ke liye

karam kiya meri jaanib jo tum ne dekh liya

taDap raha tha andheron mein raushni ke liye

base hue hain unhin se tamam virane

bahaar DhunD rahe the jo zindagi ke liye

baghair dard kise kaun yaad karta hai

yahin to gham ki zarurat hai aadmi ke liye

yaqin hai ki sahar tak pahunch hi jaunga

guzar raha hun andheron mein raushni ke liye

baghair sa’y-e-musalsal to kuchh nahin hota

junun bhi kitna zaruri hai aagahi ke liye

samajh chuka hun ki aadab-e-dosti kya hain

KHulus-e-dil ki zarurat hai dosti ke liye

na jaane kitne patangon ko kar diya be-nur

charagh kis ne jalaya hai raushni ke liye

kisi ko husn diya hai kisi ko 'ishq 'fida'

har ek chiz nahin hai har ek kisi ke liye