har kisi ke samne tishna-labi khulti nahin

har kisī ke sāmne tishna-labī khultī nahīñ

ik samundar ke sivā sab se nadī khultī nahīñ

ḳhud-numā.ī ke liye ik aa.ina bhī chāhiye

jhiil par paḌne se pahle chāñdnī khultī nahīñ

dil ke rishtoñ meñ zarūrī haiñ bahut be-bākiyāñ

ho takalluf darmiyāñ to dostī khultī nahīñ

shaam ke Dhalne se pahle ye charāġhāñ kis liye

tīrgī gahrī na ho to raushnī khultī nahīñ

ab hamāre biich darvāza nahīñ dīvār hai

aur koī dīvār dastak se kabhī khultī nahīñ

har nayā din le ke aatā hai na.ī hairāniyāñ

āḳhirī sāñsoñ talak ye zindagī khultī nahīñ

ham junūñ kī sarhadeñ bhī paar kar aa.e magar

āgahī kī raah is ke baa'd bhī khultī nahīñ

har kisi ke samne tishna-labi khulti nahin

ek samundar ke siwa sab se nadi khulti nahin

KHud-numai ke liye ek aaina bhi chahiye

jhil par paDne se pahle chandni khulti nahin

dil ke rishton mein zaruri hain bahut be-bakiyan

ho takalluf darmiyan to dosti khulti nahin

sham ke Dhalne se pahle ye charaghan kis liye

tirgi gahri na ho to raushni khulti nahin

ab hamare bich darwaza nahin diwar hai

aur koi diwar dastak se kabhi khulti nahin

har naya din le ke aata hai nai hairaniyan

aaKHiri sanson talak ye zindagi khulti nahin

hum junun ki sarhaden bhi par kar aae magar

aagahi ki rah is ke ba'd bhi khulti nahin