ہر کسی کے سامنے تشنہ لبی کھلتی نہیں

ہر کسی کے سامنے تشنہ لبی کھلتی نہیں

اک سمندر کے سوا سب سے ندی کھلتی نہیں

خودنمائی کے لئے اک آئنہ بھی چاہئے

جھیل پر پڑنے سے پہلے چاندنی کھلتی نہیں

دل کے رشتوں میں ضروری ہیں بہت بے باکیاں

ہو تکلف درمیاں تو دوستی کھلتی نہیں

شام کے ڈھلنے سے پہلے یہ چراغاں کس لئے

تیرگی گہری نہ ہو تو روشنی کھلتی نہیں

اب ہمارے بیچ دروازہ نہیں دیوار ہے

اور کوئی دیوار دستک سے کبھی کھلتی نہیں

ہر نیا دن لے کے آتا ہے نئی حیرانیاں

آخری سانسوں تلک یہ زندگی کھلتی نہیں

ہم جنوں کی سرحدیں بھی پار کر آئے مگر

آگہی کی راہ اس کے بعد بھی کھلتی نہیں