har koi hai madari aur apne madar ka

har koī hai madārī aur apne madār kā

hattā ki raqs dekhiye lail-o-nahār kā

is vaj.h se zamīn pe gaḌhtī hai merī aañkh

gaḌ jaa.e koī kāñTā na mizhgān-e-yār kā

pahle se hai hī haath meñ tasbīh kī laḌī

kartā huuñ kyā maiñ dekhiye bāñhoñ ke haar kā

ruktā huuñ is liye ki mire raftagāñ ruke

rasta hai varna sāmne mere farār kā

is baar ek do nahīñ saare gunāhgār

is baar kyā upaa.e hai kashtī ke bhaar kā

aisā na ho ki rind ye kah kar chhuḌā.eñ jaan

dahqāñ kī thī sharāb piyāla kumhār kā

us ko uḌā liyā hai koī aur jauharī

mahñgā paḌā hai aaj kā sonā sunār kā

sāmān ḳhuub ho to jagah se hai kyā ġharaz

biktā hai kanpūr meñ chamḌā bihār kā

har koi hai madari aur apne madar ka

hatta ki raqs dekhiye lail-o-nahaar ka

is wajh se zamin pe gaDhti hai meri aankh

gaD jae koi kanTa na mizhgan-e-yar ka

pahle se hai hi hath mein tasbih ki laDi

karta hun kya main dekhiye banhon ke haar ka

rukta hun is liye ki mere raftagan ruke

rasta hai warna samne mere farar ka

is bar ek do nahin sare gunahgar

is bar kya upae hai kashti ke bhaar ka

aisa na ho ki rind ye kah kar chhuDaen jaan

dahqan ki thi sharab piyala kumhaar ka

us ko uDa liya hai koi aur jauhari

mahnga paDa hai aaj ka sona sunar ka

saman KHub ho to jagah se hai kya gharaz

bikta hai kanpur mein chamDa bihaar ka