har koi shahr mein paband-e-ana lagta hai

har koī shahr meñ pāband-e-anā lagtā hai

kyā tamāshā hai ki har shaḳhs ḳhudā lagtā hai

maiñ ne hijrat ke bayābāñ meñ riyāzat kī hai

ab ye jañgal mujhe firdaus-numā lagtā hai

dīda-e-shoḳh meñ dekhā hai utar kar maiñ ne

husn pindār hai parde meñ bhalā lagtā hai

jab tire ġham se nikalne kī na sūrat nikle

terā vahshī kisī dīvār se jā lagtā hai

is ko sarkār ke bose kā sharaf hāsil hai

varna kaalā sā ye patthar mirā kyā lagtā hai

ab bhī jaatā huuñ kaTe peḌ kā saaya lene

muddatoñ se jo bhalā thā so bhalā lagtā hai

har koi shahr mein paband-e-ana lagta hai

kya tamasha hai ki har shaKHs KHuda lagta hai

main ne hijrat ke bayaban mein riyazat ki hai

ab ye jangal mujhe firdaus-numa lagta hai

dida-e-shoKH mein dekha hai utar kar main ne

husn pindar hai parde mein bhala lagta hai

jab tere gham se nikalne ki na surat nikle

tera wahshi kisi diwar se ja lagta hai

is ko sarkar ke bose ka sharaf hasil hai

warna kala sa ye patthar mera kya lagta hai

ab bhi jata hun kaTe peD ka saya lene

muddaton se jo bhala tha so bhala lagta hai