ہر لحظہ مکیں دل میں تری یاد رہے گی

ہر لحظہ مکیں دل میں تری یاد رہے گی

بستی یہ اجڑنے پہ بھی آباد رہے گی

ہے ہستیٔ عاشق کا بس اتنا ہی فسانہ

برباد تھی برباد ہے برباد رہے گی

ہے عشق وہ نعمت جو خریدی نہیں جاتی

یہ شے ہے خداداد خداداد رہے گی

وہ آئے بھی تو ضبط سے لب ہل نہ سکیں گے

فریاد مری تشنۂ فریاد رہے گی

یہ حسن ستم کوش ستم کوش ہے کب تک

کب تک یہ نظر بانیٔ بیداد رہے گی

وہ زلف پریشاں کا سنوارے نہ سنورنا

وہ ان کے بگڑنے کی ادا یاد رہے گی