har lamha teri yaad baDhane ke liye hai

har lamha tirī yaad baḌhāne ke liye hai

so.e mire jazboñ ko jagāne ke liye hai

chhāloñ se mire paañv kā rishta ye purānā

tapte hue sahrā ko Darāne ke liye hai

be-sūd pareshāñ haiñ mujhe sochne vaale

raftār to ḳhvābīda jagāne ke liye hai

tum sang-tarāshoñ ko bulā kar yahāñ laanā

ik tujh se hasīñ aur banāne ke liye hai

ik halkī jhalak apnī dikhā kar chale jaanā

nazroñ se mirī mujh ko girāne ke liye hai

yuuñ hī to nahīñ chaltī havā tez chaman meñ

sūkhe hue pattoñ ko jhaḌāne ke liye hai

har ġham ko mire dil ne chhupā kar yuuñ rakhā hai

'aslam' ko ye nazroñ se bachāne ke liye hai

har lamha teri yaad baDhane ke liye hai

soe mere jazbon ko jagane ke liye hai

chhaalon se mere panw ka rishta ye purana

tapte hue sahra ko Darane ke liye hai

be-sud pareshan hain mujhe sochne wale

raftar to KHwabida jagane ke liye hai

tum sang-tarashon ko bula kar yahan lana

ek tujh se hasin aur banane ke liye hai

ek halki jhalak apni dikha kar chale jaana

nazron se meri mujh ko girane ke liye hai

yun hi to nahin chalti hawa tez chaman mein

sukhe hue patton ko jhaDane ke liye hai

har gham ko mere dil ne chhupa kar yun rakha hai

'aslam' ko ye nazron se bachane ke liye hai