har nam har andaz-e-sitam aam nahin hai

har naam har andāz-e-sitam aam nahīñ hai

leñ lutf-e-sitam sab kā to ye kaam nahīñ hai

is bazm meñ in'ām-e-jafā aam nahīñ hai

vo qadr-e-fazā-e-havas-e-ḳhām nahīñ hai

hai naam kī raT aur koī kaam nahīñ hai

ye zauq-e-talab kyā talab-e-ḳhām nahīñ hai

saaqī nahīñ sahbā nahīñ yā jaam nahīñ hai

pyāsoñ ko hī fikr-e-mai-e-gulfām nahīñ hai

sayyād nahīñ hai ki yahāñ daam nahīñ hai

haañ shohrat-e-bedād-e-chaman aam nahīñ hai

ye husn-e-jafā aur kā ye kaam nahīñ hai

har vaqt sitam phir bhī vo badnām nahīñ hai

ḳhālī mire hisse ke sivā jaam nahīñ hai

saaqī kā gilā phir bhī mirā kaam nahīñ hai

mai-ḳhāna khule pīr-e-muġhāñ izn bhī de de

betāb magar rind-e-mai-āshām nahīñ hai

jo sāmne le aa.e jamāl-e-ruḳh-o-kākul

kyoñ ab vo hamārī sahar-o-shām nahīñ hai

sun kar jise kaunain kā ġham tum ne bhulāyā

ab jaise in āñkhoñ meñ vo paiġhām nahīñ hai

zāhid kī 'ibādat pe bhī ab os paḌī hai

juz sajda-e-be-zauq kuchh iqdām nahīñ hai

badle hue hālāt haiñ ham ḳhud bhī badal jaa.eñ

ye bandagī-e-gardish-e-ayyām nahīñ hai

sayyād banā de jo ise rashk-e-chaman bhī

ārām qafas kā koī ārām nahīñ hai

ik sub.h-e-musalsal kā tasavvur hai mujhe bhī

suntā huuñ ki phir us kī koī shaam nahīñ hai

phir kyoñ vahī takrār-e-ta'addī-o-tasallī

andāz meñ kuchh aap ke ib.hām nahīñ hai

leñ 'ahd-e-vafā kyoñ na kashish par hai bharosā

ye rasm-e-ta'alluq to ḳhush-anjām nahīñ hai

'ārif' abhī sayyād ko bechain kiye hai

jo murġh-e-chaman ab bhī tah-e-dām nahīñ hai

har nam har andaz-e-sitam aam nahin hai

len lutf-e-sitam sab ka to ye kaam nahin hai

is bazm mein in'am-e-jafa aam nahin hai

wo qadr-e-faza-e-hawas-e-KHam nahin hai

hai nam ki raT aur koi kaam nahin hai

ye zauq-e-talab kya talab-e-KHam nahin hai

saqi nahin sahba nahin ya jam nahin hai

pyason ko hi fikr-e-mai-e-gulfam nahin hai

sayyaad nahin hai ki yahan dam nahin hai

han shohrat-e-bedad-e-chaman aam nahin hai

ye husn-e-jafa aur ka ye kaam nahin hai

har waqt sitam phir bhi wo badnam nahin hai

KHali mere hisse ke siwa jam nahin hai

saqi ka gila phir bhi mera kaam nahin hai

mai-KHana khule pir-e-mughan izn bhi de de

betab magar rind-e-mai-asham nahin hai

jo samne le aae jamal-e-ruKH-o-kakul

kyon ab wo hamari sahar-o-sham nahin hai

sun kar jise kaunain ka gham tum ne bhulaya

ab jaise in aankhon mein wo paigham nahin hai

zahid ki 'ibaadat pe bhi ab os paDi hai

juz sajda-e-be-zauq kuchh iqdam nahin hai

badle hue haalat hain hum KHud bhi badal jaen

ye bandagi-e-gardish-e-ayyam nahin hai

sayyaad bana de jo ise rashk-e-chaman bhi

aaram qafas ka koi aaram nahin hai

ek subh-e-musalsal ka tasawwur hai mujhe bhi

sunta hun ki phir us ki koi sham nahin hai

phir kyon wahi takrar-e-ta'addi-o-tasalli

andaz mein kuchh aap ke ibham nahin hai

len 'ahd-e-wafa kyon na kashish par hai bharosa

ye rasm-e-ta'alluq to KHush-anjam nahin hai

'arif' abhi sayyaad ko bechain kiye hai

jo murgh-e-chaman ab bhi tah-e-dam nahin hai