har nafas ek mustaqil fariyaad hai

har nafas ik mustaqil fariyād hai

kitnī pur-ġham ishq kī rūdād hai

ghaT rahī haiñ mere dil kī quvvateñ

ab ye shāyad āḳhirī fariyād hai

ho ga.ī shāyad ki ab takmīl-e-ishq

varna kyuuñ shor-e-mubārakbād hai

jism pāband-e-ta.ayyun ho to ho

ruuh to har qaid se āzād hai

phir kahāñ gulshan meñ vo āsūdgī

āshiyāñ jab vaqf-e-barq-o-bād hai

dekhiye anjām-e-kār-kā.enāt

dil mirā phir mā.il-e-fariyād hai

jis meñ 'sāqib' thā vo mujh se ham-kanār

mujh ko vo manzar abhī tak yaad hai

har nafas ek mustaqil fariyaad hai

kitni pur-gham ishq ki rudad hai

ghaT rahi hain mere dil ki quwwaten

ab ye shayad aaKHiri fariyaad hai

ho gai shayad ki ab takmil-e-ishq

warna kyun shor-e-mubarakbaad hai

jism paband-e-tayyun ho to ho

ruh to har qaid se aazad hai

phir kahan gulshan mein wo aasudgi

aashiyan jab waqf-e-barq-o-baad hai

dekhiye anjam-e-kar-kaenat

dil mera phir mail-e-fariyaad hai

jis mein 'saqib' tha wo mujh se ham-kanar

mujh ko wo manzar abhi tak yaad hai