har nafas murid-e-safar hain hum

har nafas mūrid-e-safar haiñ ham

goyā dukkān-e-shīshagar haiñ ham

sham.a ke gaah tāj-e-sar haiñ ham

gah patiñge ke bāl-o-par haiñ ham

ishq ne jab se kī hai dil kar nī

barq haiñ sho.ala haiñ sharar haiñ ham

rañg-e-rukHsār ḳhūb-rūyāñ haiñ

āh-e-ushshāq ke asar haiñ ham

ham haiñ nairañgī-e-bahār ke rañg

naḳhl-o-barg-o-gul-o-samar haiñ ham

sajda-gah haiñ tamām aalam kī

kis kī ye ḳhāk-e-rahguzar haiñ ham

ahl-e-dil apne rahte haiñ mushtāq

goiyā vasl kī ḳhabar haiñ ham

haal ḳhat-e-shikasta meñ likkhā

ya.anī us se shikasta-tar haiñ ham

dushmanī ham se ho nahīñ saktī

tujh se sharminda kīna-var haiñ ham

jab se dekhī hai us ke ghar kī raah

aur ḳhāna-ḳharāb-tar haiñ ham

rashk meñ shor-o-shar se haiñ lāchār

kuchh farishte nahīñ bashar haiñ ham

us ne ahvāl pūchhā ham mar ga.e

kis qadar qissa-muḳhtasar haiñ ham

kyā kareñ dil nahīñ hai paas 'razā'

sabr meñ varna be-jigar haiñ ham

har nafas murid-e-safar hain hum

goya dukkan-e-shishagar hain hum

shama ke gah taj-e-sar hain hum

gah patinge ke baal-o-par hain hum

ishq ne jab se ki hai dil kar ni

barq hain shoala hain sharar hain hum

rang-e-rukHsar KHub-ruyan hain

aah-e-ushshaq ke asar hain hum

hum hain nairangi-e-bahaar ke rang

naKHl-o-barg-o-gul-o-samar hain hum

sajda-gah hain tamam aalam ki

kis ki ye KHak-e-rahguzar hain hum

ahl-e-dil apne rahte hain mushtaq

goiya wasl ki KHabar hain hum

haal KHat-e-shikasta mein likkha

yani us se shikasta-tar hain hum

dushmani hum se ho nahin sakti

tujh se sharminda kina-war hain hum

jab se dekhi hai us ke ghar ki rah

aur KHana-KHarab-tar hain hum

rashk mein shor-o-shar se hain lachaar

kuchh farishte nahin bashar hain hum

us ne ahwal puchha hum mar gae

kis qadar qissa-muKHtasar hain hum

kya karen dil nahin hai pas 'raza'

sabr mein warna be-jigar hain hum