har qadam par nae aazar hua karte hain

har qadam par na.e āzār huā karte haiñ

marhale shauq ke dushvār huā karte haiñ

marsiya paḌhtā huuñ dil kā to ġhazal bantī hai

mere alfāz azādār huā karte haiñ

raqs-e-bismil ke muqaddar meñ hai dasht-o-sahrā

aur mujre sar-e-bāzār huā karte haiñ

vo alag daur thā jab 'ishq pe kuchh zor na thā

ab ke 'āshiq baḌe hushiyār huā karte haiñ

masnad-e-dars-e-suḳhan par bhī suḳhan-fahm nahīñ

sirf ġhālib ke taraf-dār huā karte haiñ

husn-e-zāhir kī haqīqat nahīñ khultī jab tak

log marne ko bhī tayyār huā karte haiñ

muskurāte hue āñkheñ bhī chhalak paḌtī haiñ

dard-e-dil yaar pur-asrār huā karte haiñ

tum ki bāzār meñ aate ho numā.ish ke liye

ham numā.ish ke ḳharīdār huā karte haiñ

baat is baat meñ hai jis se koī baat bane

yuuñ latīfe bhī mazedār huā karte haiñ

zindagī saf.ha-e-taqdīr kā afsāna hai

ham haqīqat meñ adākār huā karte haiñ

āḳhirī nān-e-shabīna kī talab meñ 'nāsir'

roz bāzār meñ ham ḳhvār huā karte haiñ

har qadam par nae aazar hua karte hain

marhale shauq ke dushwar hua karte hain

marsiya paDhta hun dil ka to ghazal banti hai

mere alfaz azadar hua karte hain

raqs-e-bismil ke muqaddar mein hai dasht-o-sahra

aur mujre sar-e-bazar hua karte hain

wo alag daur tha jab 'ishq pe kuchh zor na tha

ab ke 'ashiq baDe hushiyar hua karte hain

masnad-e-dars-e-suKHan par bhi suKHan-fahm nahin

sirf ghaalib ke taraf-dar hua karte hain

husn-e-zahir ki haqiqat nahin khulti jab tak

log marne ko bhi tayyar hua karte hain

muskuraate hue aankhen bhi chhalak paDti hain

dard-e-dil yar pur-asrar hua karte hain

tum ki bazar mein aate ho numaish ke liye

hum numaish ke KHaridar hua karte hain

baat is baat mein hai jis se koi baat bane

yun latife bhi mazedar hua karte hain

zindagi safha-e-taqdir ka afsana hai

hum haqiqat mein adakar hua karte hain

aaKHiri nan-e-shabina ki talab mein 'nasir'

roz bazar mein hum KHwar hua karte hain