har qadam par nai diwar uThane wale

har qadam par na.ī dīvār uThāne vaale

baḌe aa.e mujhe tahzīb sikhāne vaale

tū hī har riñd kā qibla ho zarūrī to nahīñ

shahr meñ kam nahīñ āñkhoñ se pilāne vaale

koī is ḳhvāb kī ta.abīr batā saktā hai

roz aate haiñ mujhe ḳhvāb Darāne vaale

jis ko dekho hai vahī paikar-e-ālām yahāñ

kho ga.e jaane kahāñ hañsne hañsāne vaale

vaqt ke aage sipar Daale hue kaun haiñ ye

ham to the vaqt kī buniyād hilāne vaale

saat pardoñ meñ tujhe DhūñDh hī leñge 'raḳhshāñ'

chain se rahne kahāñ deñge zamāne vaale

har qadam par nai diwar uThane wale

baDe aae mujhe tahzib sikhane wale

tu hi har rind ka qibla ho zaruri to nahin

shahr mein kam nahin aankhon se pilane wale

koi is KHwab ki tabir bata sakta hai

roz aate hain mujhe KHwab Darane wale

jis ko dekho hai wahi paikar-e-alam yahan

kho gae jaane kahan hansne hansane wale

waqt ke aage sipar Dale hue kaun hain ye

hum to the waqt ki buniyaad hilane wale

sat pardon mein tujhe DhunDh hi lenge 'raKHshan'

chain se rahne kahan denge zamane wale