har rag-e-gul baad-e-sarsar ke nishan Thahre hue

har rag-e-gul bād-e-sarsar ke nishāñ Thahre hue

haiñ kisī daa.im ḳhizāñ meñ gulsitāñ Thahre hue

ek tasvīr-e-tamāshā chal rahī hai raat din

aur ka.ī manzar haiñ āñkhoñ se nihāñ Thahre hue

gum hadīs-e-nafs hai harza-sarā.ī meñ kahīñ

aur bām-e-hosh haiñ vahm-o-gumāñ Thahre hue

ek sannāTe kī tah meñ sar paTaḳhtī hai sadā

chashma-e-lab par haiñ kyā sang-e-girāñ Thahre hue

roz-o-shab ke zā.ichoñ meñ hai muqayyad zindagī

aur haiñ vaqt-e-naz' meñ jism-o-jāñ Thahre hue

dil pe ab ilhām utarte haiñ 'azāboñ kī tarah

haiñ saroñ par kaise kaise āsmāñ Thahre hue

minnat-e-mā'nī nahīñ hai lazzat-e-be-iḳhtiyār

nahv-e-hairat meñ haiñ sab harf-o-bayāñ Thahre hue

jis ghaḌī us se mile the vo ghaḌī biitī nahīñ

ham to kab se haiñ vahīñ 'umr-e-ravāñ Thahre hue

raat din kartā huuñ maiñ ḳhūn-e-jigar se ehtimām

haiñ sarā.e-jāñ meñ mere mehmāñ Thahre hue

dil palaTtā hai kitāb-e-'umr ko kyoñ baar baar

sehr kyā haiñ dāstāñ-dar-dāstāñ Thahre hue

DhūñDte ho tum hameñ kyā roz-o-shab ke darmiyāñ

hai jahāñ kuchh aur hī ham haiñ jahāñ Thahre hue

har rag-e-gul baad-e-sarsar ke nishan Thahre hue

hain kisi daim KHizan mein gulsitan Thahre hue

ek taswir-e-tamasha chal rahi hai raat din

aur kai manzar hain aankhon se nihan Thahre hue

gum hadis-e-nafs hai harza-sarai mein kahin

aur baam-e-hosh hain wahm-o-guman Thahre hue

ek sannaTe ki tah mein sar paTaKHti hai sada

chashma-e-lab par hain kya sang-e-giran Thahre hue

roz-o-shab ke zaichon mein hai muqayyad zindagi

aur hain waqt-e-naz' mein jism-o-jaan Thahre hue

dil pe ab ilham utarte hain 'azabon ki tarah

hain saron par kaise kaise aasman Thahre hue

minnat-e-ma'ni nahin hai lazzat-e-be-iKHtiyar

nahw-e-hairat mein hain sab harf-o-bayan Thahre hue

jis ghaDi us se mile the wo ghaDi biti nahin

hum to kab se hain wahin 'umr-e-rawan Thahre hue

raat din karta hun main KHun-e-jigar se ehtimam

hain sarae-jaan mein mere mehman Thahre hue

dil palaTta hai kitab-e-'umr ko kyon bar bar

sehr kya hain dastan-dar-dastan Thahre hue

DhunDte ho tum hamein kya roz-o-shab ke darmiyan

hai jahan kuchh aur hi hum hain jahan Thahre hue