har shaKHs ban gaya hai KHuda tere shahr mein

har shaḳhs ban gayā hai ḳhudā tere shahr meñ

kis kis ke dar pe māñgīñ duā tere shahr meñ

mujrim haiñ saare ahl-e-vafā tere shahr meñ

kyā ḳhuub hai vafā kā sila tere shahr meñ

ahl-e-havas ke naam se haiñ rū-shanās ḳhalq

miltī hai jin ko dād-e-vafā tere shahr meñ

rakhte haiñ log tohmateñ apne nasīb par

karte haiñ yuuñ bhī terā gilā tere shahr meñ

apnoñ pe e'timād na ġhairoñ pe e'timād

ye kaisī chal paḌī hai havā tere shahr meñ

hotā hai kis maraz kā mudāvā tire yahāñ

miltī hai kis maraz kī davā tere shahr meñ

rakhte haiñ har jazā ko qayāmat pe munhasir

dete haiñ har ḳhatā kī sazā tere shahr meñ

har shaKHs ban gaya hai KHuda tere shahr mein

kis kis ke dar pe mangin dua tere shahr mein

mujrim hain sare ahl-e-wafa tere shahr mein

kya KHub hai wafa ka sila tere shahr mein

ahl-e-hawas ke nam se hain ru-shanas KHalq

milti hai jin ko dad-e-wafa tere shahr mein

rakhte hain log tohmaten apne nasib par

karte hain yun bhi tera gila tere shahr mein

apnon pe e'timad na ghairon pe e'timad

ye kaisi chal paDi hai hawa tere shahr mein

hota hai kis maraz ka mudawa tere yahan

milti hai kis maraz ki dawa tere shahr mein

rakhte hain har jaza ko qayamat pe munhasir

dete hain har KHata ki saza tere shahr mein