harf-e-haq kaun kahe ab sar-e-darbar miyan

harf-e-haq kaun kahe ab sar-e-darbār miyāñ

sar jhukā.e haiñ khaḌe sab tire sardār miyāñ

koī vardī na sanad hai use darkār miyāñ

rahnumā merā ho bas sāhab-e-kirdār miyāñ

kaise hotī hai sahar kis ko sahar kahte haiñ

vahī jaane jo rahā raat meñ bedār miyāñ

tum sahārā mujhe kyā doge kabhī mushkil meñ

tum to ḳhud se bhī nazar aate ho bezār miyāñ

haa.e kyā soch ke nikle the kabhī ghar se tum

māñgte phirte ho ab sāya-e-dīvār miyāñ

raushnī bhī nahīñ in meñ na hai ḳhushbū koī

kyā kitābeñ tirī kyā haiñ tire ash.ār miyāñ

ḳhuuñ kiyā dil ko liyā daaġh jigar par maiñ ne

mujh se pūchho ki hai kyā ishq kā āzār miyāñ

ġham na siine se lagā.e maiñ jahāñ se jaatā

mujh ko duniyā meñ jo miltā koī ġham-ḳhvār miyāñ

har taraf jalva-numā.ī thī usī kī 'mas.ūd'

tum rahe phir bhī yahāñ tishna-e-dīdār miyāñ

harf-e-haq kaun kahe ab sar-e-darbar miyan

sar jhukae hain khaDe sab tere sardar miyan

koi wardi na sanad hai use darkar miyan

rahnuma mera ho bas sahab-e-kirdar miyan

kaise hoti hai sahar kis ko sahar kahte hain

wahi jaane jo raha raat mein bedar miyan

tum sahaara mujhe kya doge kabhi mushkil mein

tum to KHud se bhi nazar aate ho bezar miyan

hae kya soch ke nikle the kabhi ghar se tum

mangte phirte ho ab saya-e-diwar miyan

raushni bhi nahin in mein na hai KHushbu koi

kya kitaben teri kya hain tere ashaar miyan

KHun kiya dil ko liya dagh jigar par main ne

mujh se puchho ki hai kya ishq ka aazar miyan

gham na sine se lagae main jahan se jata

mujh ko duniya mein jo milta koi gham-KHwar miyan

har taraf jalwa-numai thi usi ki 'masud'

tum rahe phir bhi yahan tishna-e-didar miyan