harf-o-alfaz-o-ma’ani ke hijabon mein na thi

harf-o-alfāz-o-ma’ānī ke hijāboñ meñ na thī

baat chehroñ par jo likkhī thī kitāboñ meñ na thī

'umr guzrī apne hī ghar kā bayābāñ chhānte

dilkashī itnī to chamkīle sarāboñ meñ na thī

maiñ thā apne 'ahd kī sachchā.iyoñ kā vo savāl

jis ko rad karne kī gunjā.ish javāboñ meñ na thī

ab huā mā'lūm tere shahr se hijrat ke baa'd

kyā ḳharābī thī jo ham ḳhāna-ḳharāboñ meñ na thī

uñgliyoñ kī ye jarāhat ye qalam kī ḳhastagī

kab hamārī zindagī aise ‘azāboñ meñ na thī

kar rahā huuñ kārobār-e-she'r meñ apne ko ḳharch

varna aisī mad koī ghar ke hisāboñ meñ na thī

ye bhī she’rī tajraboñ kā ik tasalsul hai 'fazā'

ab ġhazal jaisī hai vo kitnoñ ke ḳhvāboñ meñ na thī

harf-o-alfaz-o-ma’ani ke hijabon mein na thi

baat chehron par jo likkhi thi kitabon mein na thi

'umr guzri apne hi ghar ka bayaban chhante

dilkashi itni to chamkile sarabon mein na thi

main tha apne 'ahd ki sachchaiyon ka wo sawal

jis ko rad karne ki gunjaish jawabon mein na thi

ab hua ma'lum tere shahr se hijrat ke ba'd

kya KHarabi thi jo hum KHana-KHarabon mein na thi

ungliyon ki ye jarahat ye qalam ki KHastagi

kab hamari zindagi aise ‘azabon mein na thi

kar raha hun karobar-e-she'r mein apne ko KHarch

warna aisi mad koi ghar ke hisabon mein na thi

ye bhi she’ri tajrabon ka ek tasalsul hai 'faza'

ab ghazal jaisi hai wo kitnon ke KHwabon mein na thi