hasin KHwabon ke bistar se uThane aa gae shayad

hasīñ ḳhvāboñ ke bistar se uThāne aa ga.e shāyad

na.e sūraj mirī nīñdeñ uḌāne aa ga.e shāyad

bahut māyūs nazroñ se hamārī or taktī hai

safīrān-e-sahar shab ko bulāne aa ga.e shāyad

kahānī ik na.e 'unvān pe aane hī vaalī thī

magar phir biich meñ qisse purāne aa ga.e shāyad

laboñ par muskurāhaT Taañk lete haiñ salīqe se

hameñ bhī dard ke rishte nibhāne aa ga.e shāyad

hamārā dard ashkoñ meñ nahīñ she'roñ meñ Dhaltā hai

hameñ bhī Thiik se aañsū bahāne aa ga.e shāyad

hamārī vahshateñ had se ziyāda baḌh ga.iiñ āḳhir

hamāre raqs karne ke zamāne aa ga.e shāyad

hamārā naam le le kar pukāre hai har ik shai ko

sunā hai hosh manzil ke Thikāne aa ga.e shāyad

hasin KHwabon ke bistar se uThane aa gae shayad

nae suraj meri ninden uDane aa gae shayad

bahut mayus nazron se hamari or takti hai

safiran-e-sahar shab ko bulane aa gae shayad

kahani ek nae 'unwan pe aane hi wali thi

magar phir bich mein qisse purane aa gae shayad

labon par muskurahaT Tank lete hain saliqe se

hamein bhi dard ke rishte nibhane aa gae shayad

hamara dard ashkon mein nahin she'ron mein Dhalta hai

hamein bhi Thik se aansu bahane aa gae shayad

hamari wahshaten had se ziyaada baDh gain aaKHir

hamare raqs karne ke zamane aa gae shayad

hamara nam le le kar pukare hai har ek shai ko

suna hai hosh manzil ke Thikane aa gae shayad