hausle ki kami se Darta hun

hausle kī kamī se Dartā huuñ

duur kī raushnī se Dartā huuñ

dekh kar bastiyoñ kī vīrānī

ab to har aadmī se Dartā huuñ

aql tāroñ ko chhū ke aatī hai

aur maiñ chāñdnī se Dartā huuñ

pahle Dartā thā tīrgī se maiñ

aur ab raushnī se Dartā huuñ

merī bechārgī to ye bhī hai

aap kī dostī se Dartā huuñ

ye bhī ik phāñs bin na jaa.e kahīñ

ġham kī āsūdgī se Dartā huuñ

terī zulfoñ kī chhāñv meñ rah kar

aane vaalī ḳhushī se Dartā huuñ

tum to tark-e-vafā bhī kar loge

aur meñ us ghaḌī se Dartā huuñ

be-ġharaz kaun hai ki ai 'shaukat'

maiñ ye kah duuñ usī se Dartā huuñ

hausle ki kami se Darta hun

dur ki raushni se Darta hun

dekh kar bastiyon ki virani

ab to har aadmi se Darta hun

aql taron ko chhu ke aati hai

aur main chandni se Darta hun

pahle Darta tha tirgi se main

aur ab raushni se Darta hun

meri bechaargi to ye bhi hai

aap ki dosti se Darta hun

ye bhi ek phans bin na jae kahin

gham ki aasudgi se Darta hun

teri zulfon ki chhanw mein rah kar

aane wali KHushi se Darta hun

tum to tark-e-wafa bhi kar loge

aur mein us ghaDi se Darta hun

be-gharaz kaun hai ki ai 'shaukat'

main ye kah dun usi se Darta hun